Sua Exelensia Sra. Maria Fernanda Lay, Prezidenti Parlamentu Nasionál (PPN) entrega hikas Motor Roda tolu ba Ema ho Defisiénsia.
Motor roda tolu ne’ebe mak RHTO entrega ba PPN iha loron 03 fulan Setembru iha RHTO nia Gala Dinner, Palacio Nobre, Lahane Osidental. Exelensia PPN momentu ne’ebá husu RHTO atu ajuda identifika Ema ho Defisiénsia nune’e hafasil Exelensia PPN desidi Ema ho Defisiénsia bele hetan motor refere hodi utiliza.
Ohin loron Exelensia PPN entraga direta modifikasaun motor roda tolu ba ema ho defisiensia ho naran, Jose Corbafo ho Defisiénsia fiziku husi RAEOA. Iha okaziaun ne’e Sr.Corbafo sente kontenti no orgullu tebes, tamba durante ne’e hakarak tebes oinsa atu hetan motor ida atu fasilita nia atu hala’o nia negosiu kiik hanesan loke kios no hadia sasan eletroniku sira iha suku Padeai, Oe-cusse hodi sustenta nia familia, liu liu nia oan nain rua hodi kontinua nia estudu iha Universidade. Ohin loron Sr .Corbafo simu duni motor roda 3 husi Exelensia PPN.
Sr. Corbafo espresa katak hanesan grasa ida ba nia no agradese ba Maromak buat hotu la’o tuir nia tempu tamba durante ne’e esforsu hela maibe la iha rezultadu maibé ohin mehi ne’e hetan ona responde, tenik (Sr.Corbafo). Modifikasaun Motor Roda Tolu ne’e RHTO hala’o liu husi apoia finansia hosi MISEREOR/KZE.
Iha biban ne’e, RHTO rekomenda ba Orgaun soberania sira liu liu Parlamentu Nasional katak besik dadauk ona ba debate OGE 2025 tamba ne’e RHTO husu exelensia nafatin sai hanesan promotor ba direitu ema ho defisiénsia liu-liu oinsa mak bele fo hanoin ba ita nia orgaun estadu liu-liu Ministeriu sira ne’ebe mak hola parte iha PAN-EHD 2021-2030 ne’ebe mak aprovadu ona iha Konselu Ministru no Konvensaun direitu ema ho defisiénsia ne’ebe aprova no Ratifika ona iha Parlamentu Nasionál iha 2022, no Konvensaun kona-ba Direitu Ema ho Defisiénsia (CRPD) entre em vigór hafoin Konvensaun refere Estadu Timor-Leste ratifika iha ONU iha inisiu 2023. Ho ratifikasaun ba Konvensaun ne’e, governu no liña Ministeriu sira bele konsidera aloka Orsamentu Geral Estadu tuir programa ne’ebe sensivel tamba Timor-Leste mos adere ona ba Komprimisiu ODS katak” la bele husik ema ida hela iha kotuk”
*SuraHoHauIhaOGE2025#
